kaam aain talluq ki baisakhiyan chand mathon pe mahtab Tanke gae

kaam aa.iiñ ta'alluq kī baisākhiyāñ chand māthoñ pe mahtāb Tāñke ga.e

āḳhirī saf meñ baiThe huoñ kī kaho kab uThāyā gayā aur hāñke ga.e

sham.a-dān-e-ġhazal se bhaḌaktī huī ballī-mārāñ meñ koī havelī nahīñ

gomtī ke kināre añdherā huā marsiya sun ke majlis se bāñke ga.e

chiq uThā.ī to duniyā ke bāzār meñ ḳhvāhishoñ kī najāsat kā ambār thā

ham ne bajtā huā har kaTorā sunā aur khiḌkī se chup-chāp jhāñke ga.e

zard sikkoñ kā sandūq khultā rahā baaT chaḌhte rahe maal tultā rahā

chaar jānib se bolī baḌhā.ī ga.ī sher beche ga.e lafz aañke ga.e

shaah shānoñ pe rakkhe hue taḳht par devtā kī samājat meñ masrūf thā

bad-duā.eñ ugalte hue bad-zabāñ aah bharte rahe dhuul phāñke ga.e

āḳhirī bastiyoñ kī kahānī suno surḳh īñToñ kī bhaTTī bujhā.ī ga.ī

phuul retī ke nīche dabā.e ga.e chaah miTTī ke Tīloñ se Dhāñke ga.e

jāñ-kanī kī aziyyat meñ ġham-ḳhvār kyā ek marte hue ko azādār kyā

kab lahad meñ kahīñ sham.a rakkhī ga.ī kyā kafan meñ kabhī phuul Tāñke ga.e

kaam aain ta'alluq ki baisakhiyan chand mathon pe mahtab Tanke gae

aaKHiri saf mein baiThe huon ki kaho kab uThaya gaya aur hanke gae

shama-dan-e-ghazal se bhaDakti hui balli-maran mein koi haweli nahin

gomti ke kinare andhera hua marsiya sun ke majlis se banke gae

chiq uThai to duniya ke bazar mein KHwahishon ki najasat ka ambar tha

hum ne bajta hua har kaTora suna aur khiDki se chup-chap jhanke gae

zard sikkon ka sanduq khulta raha baT chaDhte rahe mal tulta raha

chaar jaanib se boli baDhai gai sher beche gae lafz aanke gae

shah shanon pe rakkhe hue taKHt par dewta ki samajat mein masruf tha

bad-duaen ugalte hue bad-zaban aah bharte rahe dhul phanke gae

aaKHiri bastiyon ki kahani suno surKH inTon ki bhaTTi bujhai gai

phul reti ke niche dabae gae chah miTTi ke Tilon se Dhanke gae

jaan-kani ki aziyyat mein gham-KHwar kya ek marte hue ko azadar kya

kab lahad mein kahin shama rakkhi gai kya kafan mein kabhi phul Tanke gae