کام آتا غم نہاں دل کا

کام آتا غم نہاں دل کا

کاش کرتے وہ امتحاں دل کا

شرح افسانۂ محبت ہے

چشم تر ہے مری بیاں دل کا

کہہ گئی سب خموشیٔ بے جا

راز رہتا ہے کب نہاں دل کا

اس میں ان کا بھی کچھ اشارہ ہے

دشمن جاں ہے آسماں دل کا

مجھ کو دیتے ہیں کیوں نوید نشاط

عالم غم نہ ہو عیاں دل کا

تو ہوا جب سے جاگزیں دل میں

ذرہ ذرہ ہے آسماں دل کا

کیوں سراپا الم نہ بن جاتی

داستاں دل کی تھی بیاں دل کا

کیا دکھائیں کسے دکھائیں ہم

زخم اور زخم بے نشاں دل کا

بے خودی دل کی کھینچ لائی کہاں

کوئی محرم نہیں جہاں دل کا

سرزمیں عشق کی وہیں سمجھو

قدم آ کے رکے جہاں دل کا

جس نے مارا اسی پہ مرتا ہے

دشمن جاں ہے جان جاں دل کا

کوئی اس طرح بھی مٹاتا ہے

کچھ تو چھوڑو کہیں نشاں دل کا

گم ہوا اپنی وسعتوں میں خود

لٹ گیا خود ہی کارواں دل کا

جان جاتی ہے گر تو جائے جنوں

راز آئے نہ تا زباں دل کا