kaam aata gham-e-nihan dil ka

kaam aatā ġham-e-nihāñ dil kā

kaash karte vo imtihāñ dil kā

sharh-e-afsāna-e-mohabbat hai

chashm-e-tar hai mirī bayāñ dil kā

kah ga.ī sab ḳhamoshī-e-bejā

raaz rahtā hai kab nihāñ dil kā

is meñ un kā bhī kuchh ishāra hai

dushman-e-jāñ hai āsmāñ dil kā

mujh ko dete haiñ kyoñ naved-e-nashāt

ālam-e-ġham na ho ayaañ dil kā

tū huā jab se jāguzīñ dil meñ

zarra-zarra hai āsmāñ dil kā

kyoñ sarāpā alam na ban jaatī

dāstāñ dil kī thī bayāñ dil kā

kyā dikhā.eñ kise dikhā.eñ ham

zaḳhm aur zaḳhm-e-be-nishāñ dil kā

be-ḳhudī dil kī khīñch laa.ī kahāñ

koī mahram nahīñ jahāñ dil kā

sarzamīñ ishq kī vahīñ samjho

qadam aa ke ruke jahāñ dil kā

jis ne maarā usī pe martā hai

dushman-e-jāñ hai jān-e-jāñ dil kā

koī is tarah bhī miTātā hai

kuchh to chhoḌo kahīñ nishāñ dil kā

gum huā apnī vus.atoñ meñ ḳhud

luT gayā ḳhud hī kārvāñ dil kā

jaan jaatī hai gar to jaa.e 'junūñ'

raaz aa.e na tā-zabāñ dil kā

kaam aata gham-e-nihan dil ka

kash karte wo imtihan dil ka

sharh-e-afsana-e-mohabbat hai

chashm-e-tar hai meri bayan dil ka

kah gai sab KHamoshi-e-beja

raaz rahta hai kab nihan dil ka

is mein un ka bhi kuchh ishaara hai

dushman-e-jaan hai aasman dil ka

mujh ko dete hain kyon nawed-e-nashat

aalam-e-gham na ho ayan dil ka

tu hua jab se jaguzin dil mein

zarra-zarra hai aasman dil ka

kyon sarapa alam na ban jati

dastan dil ki thi bayan dil ka

kya dikhaen kise dikhaen hum

zaKHm aur zaKHm-e-be-nishan dil ka

be-KHudi dil ki khinch lai kahan

koi mahram nahin jahan dil ka

sarzamin ishq ki wahin samjho

qadam aa ke ruke jahan dil ka

jis ne mara usi pe marta hai

dushman-e-jaan hai jaan-e-jaan dil ka

koi is tarah bhi miTata hai

kuchh to chhoDo kahin nishan dil ka

gum hua apni wusaton mein KHud

luT gaya KHud hi karwan dil ka

jaan jati hai gar to jae 'junun'

raaz aae na ta-zaban dil ka