kaam aati nahin ab koi tadbir hamari

kaam aatī nahīñ ab koī tadbīr hamārī

ham se hai ḳhafā sāhibo taqdīr hamārī

aatā hī nahīñ baaz kabhī kār-e-ziyāñ se

paanī pe banātā hai vo tasvīr hamārī

ab sar pe Thahartī nahīñ dastār-e-shujā.at

ḳhud apnā lahū piitī hai shamshīr hamārī

ham ḳhāna-ḳharābī ke asar se nahīñ nikle

puurī na huī hasrat-e-tāmīr hamārī

ab rū-ba-rū aatī hī nahīñ sub.h-e-masarrat

Taltī hī nahīñ hai shab-e-dil-gīr hamārī

har shaḳhs haqārat se hameñ dekh rahā hai

koī bhī batātā nahīñ taqsīr hamārī

vo gosha-e-tanhā.ī meñ paḌhtā hai shab o roz

us ke varaq dil pe hai tahrīr hamārī

gumrāh na hone diyā sābit-qadamī ne

shā.ista-e-tahzīb hai zanjīr hamārī

ham vajd meñ Duube rahe aur ret kī sūrat

muTThī se saraktī rahī jāgīr hamārī

be-tāb-o-tavāñ zīnat-e-dīvār hai 'aḳhtar'

ab larza-bar-andām hai shamshīr hamārī

kaam aati nahin ab koi tadbir hamari

hum se hai KHafa sahibo taqdir hamari

aata hi nahin baz kabhi kar-e-ziyan se

pani pe banata hai wo taswir hamari

ab sar pe Thaharti nahin dastar-e-shujaat

KHud apna lahu piti hai shamshir hamari

hum KHana-KHarabi ke asar se nahin nikle

puri na hui hasrat-e-tamir hamari

ab ru-ba-ru aati hi nahin subh-e-masarrat

Talti hi nahin hai shab-e-dil-gir hamari

har shaKHs haqarat se hamein dekh raha hai

koi bhi batata nahin taqsir hamari

wo gosha-e-tanhai mein paDhta hai shab o roz

us ke waraq dil pe hai tahrir hamari

gumrah na hone diya sabit-qadami ne

shaista-e-tahzib hai zanjir hamari

hum wajd mein Dube rahe aur ret ki surat

muTThi se sarakti rahi jagir hamari

be-tab-o-tawan zinat-e-diwar hai 'aKHtar'

ab larza-bar-andam hai shamshir hamari