kaam ab aati nahin hai koi tadbir ki bas

kaam ab aatī nahīñ hai koī tadbīr ki bas

is tarah rūThī hai mujh se mirī taqdīr ki bas

dushman-e-jāñ bhī chalā aa.e khiñchā aap ke paas

kījiye aahoñ meñ paidā koī tāsīr ki bas

baad marne ke khulī rah ga.iiñ āñkheñ merī

is qadar aap ne kī aane meñ tāḳhīr ki bas

TuuT kar chuur huā ā.ina-e-dil merā

haa.e kuchh aisī milī ḳhvāboñ kī ta.abīr ki bas

ranj-o-ġham dard-o-alam dīda-e-nam yaar sanam

aur kuchh is ke sivā hai koī jāgīr ki bas

jis ko firdaus-e-zamīñ kahtī thī duniyā 'nāzāñ'

kyā vahī aaj bhī hai vādī-e-kashmīr ki bas

kaam ab aati nahin hai koi tadbir ki bas

is tarah ruThi hai mujh se meri taqdir ki bas

dushman-e-jaan bhi chala aae khincha aap ke pas

kijiye aahon mein paida koi tasir ki bas

baad marne ke khuli rah gain aankhen meri

is qadar aap ne ki aane mein taKHir ki bas

TuT kar chur hua aaina-e-dil mera

hae kuchh aisi mili KHwabon ki tabir ki bas

ranj-o-gham dard-o-alam dida-e-nam yar sanam

aur kuchh is ke siwa hai koi jagir ki bas

jis ko firdaus-e-zamin kahti thi duniya 'nazan'

kya wahi aaj bhi hai wadi-e-kashmir ki bas