kaam hain aur zaruri kai karne ke liye

kaam haiñ aur zarūrī ka.ī karne ke liye

kaun baiThā hai tire ishq meñ marne ke liye

raat guzre hue ḳhvāboñ kī ridā oḌhe thī

subah-e-tābīr ke chilman pe bikharne ke liye

īstāda the sitāre tirī dahlīz ke saath

chāñd be-chain thā āñgan meñ utarne ke liye

dast-e-fan-kār kī fankārī kā aalam ye ho

naqsh be-chain ho patthar pe ubharne ke liye

koī manzil to mile ābla-pā.ī ke tufail

koī sūrat to bane chehra sañvarne ke liye

is hujūm-e-kas-o-nā-kas ko bhī jaanā hai kahīñ

rāsta dījiye is ko bhī guzarne ke liye

kaam hain aur zaruri kai karne ke liye

kaun baiTha hai tere ishq mein marne ke liye

raat guzre hue KHwabon ki rida oDhe thi

subah-e-tabir ke chilman pe bikharne ke liye

istada the sitare teri dahliz ke sath

chand be-chain tha aangan mein utarne ke liye

dast-e-fan-kar ki fankari ka aalam ye ho

naqsh be-chain ho patthar pe ubharne ke liye

koi manzil to mile aabla-pai ke tufail

koi surat to bane chehra sanwarne ke liye

is hujum-e-kas-o-na-kas ko bhi jaana hai kahin

rasta dijiye is ko bhi guzarne ke liye