kaam itne hain ki aaram nahin jaante hain

kaam itne haiñ ki ārām nahīñ jānte haiñ

log ye sab se aham kaam nahīñ jānte haiñ

facebōk par haiñ mire jānñe vaale lākhoñ

mere ham-sā.e mirā naam nahīñ jānte haiñ

ishq meñ zehn ko taklīf na dī dil kī sunī

ham usī vāste anjām nahīñ jānte haiñ

hameñ bas itnā patā hai ki ḳhudā hotā hai

ham in aqsām kī aqsām nahīñ jānte haiñ

sab ne cigarette kī tarah muñh se lagā lī duniyā

hai nasha itnā ki anjām nahīñ jānte haiñ

de to sakte haiñ sabhī jaan ḳhudā kī ḳhātir

par ḳhudāvand ke ahkām nahīñ jānte haiñ

maiñ ki logoñ meñ bahut kam hī rahā huuñ 'zīshān'

is liye log mujhe aam nahīñ jānte haiñ

kaam itne hain ki aaram nahin jaante hain

log ye sab se aham kaam nahin jaante hain

facebook par hain mere jaanne wale lakhon

mere ham-sae mera nam nahin jaante hain

ishq mein zehn ko taklif na di dil ki suni

hum usi waste anjam nahin jaante hain

hamein bas itna pata hai ki KHuda hota hai

hum in aqsam ki aqsam nahin jaante hain

sab ne cigarette ki tarah munh se laga li duniya

hai nasha itna ki anjam nahin jaante hain

de to sakte hain sabhi jaan KHuda ki KHatir

par KHudawand ke ahkaam nahin jaante hain

main ki logon mein bahut kam hi raha hun 'zishan'

is liye log mujhe aam nahin jaante hain