kaam kya kijiye aaghaz wahan az-sar-e-nau

kaam kyā kījiye āġhāz vahāñ az-sar-e-nau

az-sar-e-nau bhī na rah paa.e jahāñ az-sar-e-nau

kohna buniyādoñ pe Dhote raheñ ḳhud ko kab tak

chāhiye ab ki ho tā'mīr-e-makāñ az-sar-e-nau

ho chukī dasht-e-haqīqat kī pazīrā.ī bahut

safar-e-ḳhvāb pe honā hai ravāñ az-sar-e-nau

ātish-e-shauq bujhāte hue Dar lagtā hai

phail jaa.e na fazāoñ meñ dhuāñ az-sar-e-nau

silsila hai ye kabhī ḳhatm na hone vaalā

paḌhtā rahtā huuñ kitāb-e-dil-o-jāñ az-sar-e-nau

vo mirī baat kisī taur samajhtā hī nahīñ

sīkhnī hogī mohabbat kī zabāñ az-sar-e-nau

muddatoñ baa'd kisī yaad ne phir shorish kī

dard phir hone lagā dil meñ javāñ az-sar-e-nau

phir kisī karb se do-chār huī merī zabāñ

phir koī dāstāñ karnī hai bayāñ az-sar-e-nau

kaam kya kijiye aaghaz wahan az-sar-e-nau

az-sar-e-nau bhi na rah pae jahan az-sar-e-nau

kohna buniyaadon pe Dhote rahen KHud ko kab tak

chahiye ab ki ho ta'mir-e-makan az-sar-e-nau

ho chuki dasht-e-haqiqat ki pazirai bahut

safar-e-KHwab pe hona hai rawan az-sar-e-nau

aatish-e-shauq bujhate hue Dar lagta hai

phail jae na fazaon mein dhuan az-sar-e-nau

silsila hai ye kabhi KHatm na hone wala

paDhta rahta hun kitab-e-dil-o-jaan az-sar-e-nau

wo meri baat kisi taur samajhta hi nahin

sikhni hogi mohabbat ki zaban az-sar-e-nau

muddaton ba'd kisi yaad ne phir shorish ki

dard phir hone laga dil mein jawan az-sar-e-nau

phir kisi karb se do-chaar hui meri zaban

phir koi dastan karni hai bayan az-sar-e-nau