کام کیا کیجئے آغاز وہاں از سر نو

کام کیا کیجئے آغاز وہاں از سر نو

از سر نو بھی نہ رہ پائے جہاں از سر نو

کہنہ بنیادوں پہ ڈھوتے رہیں خود کو کب تک

چاہئے اب کہ ہو تعمیر مکاں از سر نو

ہو چکی دشت حقیقت کی پذیرائی بہت

سفر خواب پہ ہونا ہے رواں از سر نو

آتش شوق بجھاتے ہوئے ڈر لگتا ہے

پھیل جائے نہ فضاؤں میں دھواں از سر نو

سلسلہ ہے یہ کبھی ختم نہ ہونے والا

پڑھتا رہتا ہوں کتاب دل و جاں از سر نو

وہ مری بات کسی طور سمجھتا ہی نہیں

سیکھنی ہوگی محبت کی زباں از سر نو

مدتوں بعد کسی یاد نے پھر شورش کی

درد پھر ہونے لگا دل میں جواں از سر نو

پھر کسی کرب سے دو چار ہوئی میری زباں

پھر کوئی داستاں کرنی ہے بیاں از سر نو