kaam koi to kabhi waqt se aage kar ja

kaam koī to kabhī vaqt se aage kar jā

ai dil-e-zinda mire marne se pahle mar jā

sāġhar-e-chashm ko zahrāb se ḳhālī kar de

aur jo bhartā hai tū paimāna-e-hastī bhar jā

tishnagī kam ho magar duur na hone paa.e

apne pyāse ko na sairāb-e-mohabbat kar jā

ḳhaak se tā-ba-falak ḳhvāb kā phailā dāman

koī koshish na kahīñ aur tamannā har jā

tū musāfir tire kis kaam kī shohrat 'sayyad'

ye saḳhāvat sar-e-dahlīz-e-rafīqāñ dhar jā

kaam koi to kabhi waqt se aage kar ja

ai dil-e-zinda mere marne se pahle mar ja

saghar-e-chashm ko zahrab se KHali kar de

aur jo bharta hai tu paimana-e-hasti bhar ja

tishnagi kam ho magar dur na hone pae

apne pyase ko na sairab-e-mohabbat kar ja

KHak se ta-ba-falak KHwab ka phaila daman

koi koshish na kahin aur tamanna har ja

tu musafir tere kis kaam ki shohrat 'sayyad'

ye saKHawat sar-e-dahliz-e-rafiqan dhar ja