kaam mujhse koi hua hi nahin

kaam mujh se koī huā hī nahīñ

baat ye hai ki maiñ to thā hī nahīñ

mujh se bichhḌī jo mauj-e-nik.hat-e-yār

phir maiñ us shahr meñ rahā hī nahīñ

kis tarah tark-e-mudda.ā kiije

jab koī apnā mudda.ā hī nahīñ

kaun huuñ maiñ jo rā.egāñ hī gayā

kaun thā jo kabhī milā hī nahīñ

huuñ ajab aish-e-ġham kī hālat meñ

ab kisī se koī gila hī nahīñ

baat hai rāste pe jaane kī

aur jaane kā rāsta hī nahīñ

hai ḳhudā hī pe munhasir har baat

aur aafat ye hai ḳhudā hī nahīñ

dil kī duniyā kuchh aur hī hotī

kyā kaheñ apnā bas chalā hī nahīñ

ab to mushkil hai zindagī dil kī

ya.anī ab koī mājrā hī nahīñ

har taraf ek hashr barpā hai

'jaun' ḳhud se nikal ke jā hī nahīñ

mauj aatī thī Thahrane kī jahāñ

ab vahāñ ḳhema-e-sabā hī nahīñ

kaam mujh se koi hua hi nahin

baat ye hai ki main to tha hi nahin

mujh se bichhDi jo mauj-e-nikhat-e-yar

phir main us shahr mein raha hi nahin

kis tarah tark-e-muddaa kije

jab koi apna muddaa hi nahin

kaun hun main jo raegan hi gaya

kaun tha jo kabhi mila hi nahin

hun ajab aish-e-gham ki haalat mein

ab kisi se koi gila hi nahin

baat hai raste pe jaane ki

aur jaane ka rasta hi nahin

hai KHuda hi pe munhasir har baat

aur aafat ye hai KHuda hi nahin

dil ki duniya kuchh aur hi hoti

kya kahen apna bas chala hi nahin

ab to mushkil hai zindagi dil ki

yani ab koi majra hi nahin

har taraf ek hashr barpa hai

'jaun' KHud se nikal ke ja hi nahin

mauj aati thi Thahrane ki jahan

ab wahan KHema-e-saba hi nahin