kanch ka TukDa paDa tha dasht mein

kāñch kā TukḌā paḌā thā dasht meñ

yā mirā chehra paḌā thā dasht meñ

lag rahā thā vasl kī tadfīn hai

hijr yuuñ bikhrā paḌā thā dasht meñ

us ke qadmoñ ke nishāñ mahfūz the

yuuñ lagā rasta paḌā thā dasht meñ

mere andar thal basā thā ishq kā

so mujhe aanā paḌā thā dasht meñ

dasht bhī saare kā saarā mujh meñ thā

maiñ bhī to saarā paḌā thā dasht meñ

ek tanhā.ī bichhī thī ret par

aur maiñ TuuTā paḌā thā dasht meñ

bhiiḌ meñ mujh se dilāsa gum huā

maiñ ne jab DhūñDā paḌā thā dasht meñ

dostī bhī shā.erī bhī ishq bhī

merā har rishta paḌā thā dasht meñ

partav-e-ḳhurshīd dhuñdlāne lagā

chāñd kā saaya paḌā thā dasht meñ

sirf merī hī kamī thī ai 'safī'

jo bhī thā vaisā paḌā thā dasht meñ

kanch ka TukDa paDa tha dasht mein

ya mera chehra paDa tha dasht mein

lag raha tha wasl ki tadfin hai

hijr yun bikhra paDa tha dasht mein

us ke qadmon ke nishan mahfuz the

yun laga rasta paDa tha dasht mein

mere andar thal basa tha ishq ka

so mujhe aana paDa tha dasht mein

dasht bhi sare ka sara mujh mein tha

main bhi to sara paDa tha dasht mein

ek tanhai bichhi thi ret par

aur main TuTa paDa tha dasht mein

bhiD mein mujh se dilasa gum hua

main ne jab DhunDa paDa tha dasht mein

dosti bhi shaeri bhi ishq bhi

mera har rishta paDa tha dasht mein

partaw-e-KHurshid dhundlane laga

chand ka saya paDa tha dasht mein

sirf meri hi kami thi ai 'safi'

jo bhi tha waisa paDa tha dasht mein