kanon mein chhama-chham ko dar-o-baam ne bandha

kānoñ meñ chhamā-chham ko dar-o-bām ne bāñdhā

bārish kā maza Dhaltī huī shaam ne bāñdhā

fariyād mire lab se ubalne pe tulī thī

fariyād ko phir siine meñ kohrām ne bāñdhā

maiñ apne ḳhayāloñ meñ abhī mahv-e-safar huuñ

yādoñ ke musāfir ko kahāñ shaam ne bāñdhā

ma.asūm sī sūrat liye logoñ meñ phirā huuñ

jis din se mujhe aap ke ilzām ne bāñdhā

āġhāz to dil-dāda-e-be-rāh-ravī thā

ai ishq tujhe ḳhair se anjām ne bāñdhā

is shahr ke ādāb sikhāne ke liye hī

ai ḳhvāhish-e-duniyā tujhe ehrām ne bāñdhā

uḌne ke liye merā falak kam to nahīñ thā

suntā huuñ parinde ko kisī daam ne bāñdhā

kanon mein chhama-chham ko dar-o-baam ne bandha

barish ka maza Dhalti hui sham ne bandha

fariyaad mere lab se ubalne pe tuli thi

fariyaad ko phir sine mein kohram ne bandha

main apne KHayalon mein abhi mahw-e-safar hun

yaadon ke musafir ko kahan sham ne bandha

masum si surat liye logon mein phira hun

jis din se mujhe aap ke ilzam ne bandha

aaghaz to dil-dada-e-be-rah-rawi tha

ai ishq tujhe KHair se anjam ne bandha

is shahr ke aadab sikhane ke liye hi

ai KHwahish-e-duniya tujhe ehram ne bandha

uDne ke liye mera falak kam to nahin tha

sunta hun parinde ko kisi dam ne bandha