کانوں میں رس گھول رہا ہے سناٹا

کانوں میں رس گھول رہا ہے سناٹا

شاید کچھ کچھ بول رہا ہے سناٹا

ہجر کی شب کو آنک رہی ہے تنہائی

تنہائی کو تول رہا ہے سناٹا

کوئی آہٹ کوئی سرگوشی بھی نہیں

تنہا موتی رول رہا ہے سناٹا

دن بھر کے ہنگاموں کی اک اک تہہ کو

بیٹھا بیٹھا کھول رہا ہے سناٹا

آوازوں کو پتا ہے اپنی منزل کا

اب تک ڈانواں ڈول رہا ہے سناٹا

بجلی چمکی کان میں کڑکا آئے گا

ڈر کے مارے ڈول رہا ہے سناٹا

دستک تو دی گئی تھی شور شرابے کو

دروازہ کیوں کھول رہا ہے سناٹا

رات کا پچھلا پہر بھی ہے دو پیکر بھی

ایسے میں انمول رہا ہے سناٹا

آندھی میں پیڑوں کی انگڑائی شادابؔ

جیسے بدن کو جھول رہا ہے سناٹا