kanTa sa jo chubha tha wo lau de gaya hai kya

kāñTā sā jo chubhā thā vo lau de gayā hai kyā

ghultā huā lahū meñ ye ḳhurshīd sā hai kyā

palkoñ ke biich saare ujāle simaT ga.e

saaya na saath de ye vahī marhala hai kyā

maiñ āñdhiyoñ ke paas talāsh-e-sabā meñ huuñ

tum mujh se pūchhte ho mirā hausla hai kyā

sāgar huuñ aur mauj ke har dā.ere meñ huuñ

sāhil pe koī naqsh-e-qadam kho gayā hai kyā

sau sau tarah likhā to sahī harf-e-ārzū

ik harf-e-ārzū hī mirī intihā hai kyā

ik ḳhvāb-e-dil-pazīr ghanī chhāñv kī tarah

ye bhī nahīñ to phir mirī zanjīr-e-pā hai kyā

kyā phir kisī ne qarz-e-muravvat adā kiyā

kyuuñ aañkh be-savāl hai dil phir dukhā hai kyā

kanTa sa jo chubha tha wo lau de gaya hai kya

ghulta hua lahu mein ye KHurshid sa hai kya

palkon ke bich sare ujale simaT gae

saya na sath de ye wahi marhala hai kya

main aandhiyon ke pas talash-e-saba mein hun

tum mujh se puchhte ho mera hausla hai kya

sagar hun aur mauj ke har daere mein hun

sahil pe koi naqsh-e-qadam kho gaya hai kya

sau sau tarah likha to sahi harf-e-arzu

ek harf-e-arzu hi meri intiha hai kya

ek KHwab-e-dil-pazir ghani chhanw ki tarah

ye bhi nahin to phir meri zanjir-e-pa hai kya

kya phir kisi ne qarz-e-murawwat ada kiya

kyun aankh be-sawal hai dil phir dukha hai kya