کانٹا سا میرے جسم کی گہرائیوں میں تھا

کانٹا سا میرے جسم کی گہرائیوں میں تھا

احساس کرب رات کی تنہائیوں میں تھا

ہر سمت قتل و خون کا بازار تھا مگر

امن و اماں کا ذکر بھی دانائیوں میں تھا

ہم کو قفس کے کنج میں یہ بھی پتہ چلا

اس کا پیام صبح کی پروائیوں میں تھا

پنہاں نہیں تھا صرف ملاقات کا بیاں

ہجراں کا کچھ ملال بھی شہنائیوں میں تھا

سستی کہاں تھی شہر نگاراں میں کوئی شے

جلوہ بھی اس کے حسن کا مہنگائیوں میں تھا

دامن جھٹک کے کس لئے محفل سے اٹھ گئے

مسعودؔ بھی تو آپ کے شیدائیوں میں تھا