kanTa sa mere jism ki gahraiyon mein tha

kāñTā sā mere jism kī gahrā.iyoñ meñ thā

ehsās-e-karb raat kī tanhā.iyoñ meñ thā

har samt qatl-o-ḳhūn kā bāzār thā magar

amn-o-amāñ kā zikr bhī dānā.iyoñ meñ thā

ham ko qafas ke kunj meñ ye bhī pata chalā

us kā payām sub.h kī purvā.iyoñ meñ thā

pinhāñ nahīñ thā sirf mulāqāt kā bayāñ

hijrāñ kā kuchh malāl bhī shahnā.iyoñ meñ thā

sastī kahāñ thī shahr-e-nigārāñ meñ koī shai

jalva bhī us ke husn kā mahñgā.iyoñ meñ thā

dāman jhaTak ke kis liye mahfil se uTh ga.e

'mas.ūd' bhī to aap ke shaidā.iyoñ meñ thā

kanTa sa mere jism ki gahraiyon mein tha

ehsas-e-karb raat ki tanhaiyon mein tha

har samt qatl-o-KHun ka bazar tha magar

amn-o-aman ka zikr bhi danaiyon mein tha

hum ko qafas ke kunj mein ye bhi pata chala

us ka payam subh ki purwaiyon mein tha

pinhan nahin tha sirf mulaqat ka bayan

hijran ka kuchh malal bhi shahnaiyon mein tha

sasti kahan thi shahr-e-nigaran mein koi shai

jalwa bhi us ke husn ka mahngaiyon mein tha

daman jhaTak ke kis liye mahfil se uTh gae

'masud' bhi to aap ke shaidaiyon mein tha