kanTe ko phul sang ko gauhar kaha gaya

kāñTe ko phuul sañg ko gauhar kahā gayā

is shahr meñ gadā ko sikandar kahā gayā

be-chehra log husn kā me'yār ban ga.e

parchhā.iyoñ ko nuur kā paikar kahā gayā

jallād ko masīhā-nafas kī sanad milī

insān-dushmanoñ ko payambar kahā gayā

kuchh jis ke paas nīsh-o-namak ke sivā na thā

chāk-e-jigar kā us ko rafū-gar kahā gayā

kyā shai hai maslahat bhī shab-e-tīra-fām ko

dānishvaroñ meñ sub.h-e-munavvar kahā gayā

gūñgā hai kar rahā hai ishāroñ meñ bāt-chīt

'sābir' ko kis binā pe suḳhanvar kahā gayā

kanTe ko phul sang ko gauhar kaha gaya

is shahr mein gada ko sikandar kaha gaya

be-chehra log husn ka me'yar ban gae

parchhaiyon ko nur ka paikar kaha gaya

jallad ko masiha-nafas ki sanad mili

insan-dushmanon ko payambar kaha gaya

kuchh jis ke pas nish-o-namak ke siwa na tha

chaak-e-jigar ka us ko rafu-gar kaha gaya

kya shai hai maslahat bhi shab-e-tira-fam ko

danishwaron mein subh-e-munawwar kaha gaya

gunga hai kar raha hai ishaaron mein baat-chit

'sabir' ko kis bina pe suKHanwar kaha gaya