کانٹوں کی بھی زباں پہ گلستاں کی بات ہے

کانٹوں کی بھی زباں پہ گلستاں کی بات ہے

لب پر رقیب کے غم جاناں کی بات ہے

گل کی قبا کو دیکھا تو بلبل نے یہ کہا

اہل جنوں میں چاک گریباں کی بات ہے

عارض پہ ان کے زلف پریشاں ہے آج کیوں

شاید مریض عشق کے درماں کی بات ہے

عزم جواں اگر ہے نیا آشیاں بنا

گلشن میں آج جشن چراغاں کی بات ہے

ہیں جائے عندلیب یہاں چند بال و پر

زنداں کی بات اب ہے نہ درباں کی بات ہے

ہوش و خرد بہار میں رخصت ہوئے کمالؔ

دامن رفو کیا تو گریباں کی بات ہے