kar-e-duniya se gae dida-e-bedar ke sath

kār-e-duniyā se ga.e dīda-e-bedār ke saath

rabt lāzim thā magar nargis-e-bīmār ke saath

qīmat-e-shauq baḌhī ek hī inkār ke saath

vāqi.a kuchh to huā chashm-e-ḳharīdār ke saath

har koī jaan bachāne ke liye dauḌ paḌā

kaun thā āḳhir-e-dam qāfila-sālār ke saath

maiñ tire ḳhvāb se aage bhī nikal saktā huuñ

dekh mujh ko na parakh vaqt kī raftār ke saath

zulm se haath uThānā nahīñ aatā hai agar

kuchh ri.āyat hī karo apne giraftār ke saath

qīmat-e-husn-o-adā jaan kī baazī Thahrī

log aa.e the vahāñ dirham-o-dīnār ke saath

had se baḌh kar bhī taġhāful nahīñ achchhā hotā

kuchh ta.alluq bhī to rakhte haiñ parastār ke saath

kar-e-duniya se gae dida-e-bedar ke sath

rabt lazim tha magar nargis-e-bimar ke sath

qimat-e-shauq baDhi ek hi inkar ke sath

waqia kuchh to hua chashm-e-KHaridar ke sath

har koi jaan bachane ke liye dauD paDa

kaun tha aaKHir-e-dam qafila-salar ke sath

main tere KHwab se aage bhi nikal sakta hun

dekh mujh ko na parakh waqt ki raftar ke sath

zulm se hath uThana nahin aata hai agar

kuchh riayat hi karo apne giraftar ke sath

qimat-e-husn-o-ada jaan ki bazi Thahri

log aae the wahan dirham-o-dinar ke sath

had se baDh kar bhi taghaful nahin achchha hota

kuchh talluq bhi to rakhte hain parastar ke sath