kar-e-hasti Khaar-o-gul ke darmiyan banta gaya

kār-e-hastī ḳhār-o-gul ke darmiyāñ bantā gayā

bijliyāñ girtī ga.iiñ aur āshiyāñ bantā gayā

ashk-e-ḳhūñ bahne kā chehre par nishāñ bantā gayā

maiñ mujassam dard-o-ġham kī dāstāñ bantā gayā

āh-o-giryā nā-munāsib zabt fitrat ke ḳhilāf

dard mere vāste ik imtihāñ bantā gayā

har qadam ubhrā kiye naqsh-e-kaf-e-pā-e-jamāl

gul pe gul khilte ga.e aur gulsitāñ bantā gayā

vaqt ne gulchīñ ke hāthoñ qismat-e-gul sauñp dī

ya.anī har bāġhī chaman kā bāġhbāñ bantā gayā

sach to ye hai inqilābāt-e-zamāna ke tufail

ek ek rahzan amīr-e-kārvāñ bantā gayā

sab mujhe kahte haiñ ḳhosha-chīn-e-gulzār-e-'zabīh'

'nūr' unhīñ ke faiz se rangīñ-bayāñ bantā gayā

kar-e-hasti KHar-o-gul ke darmiyan banta gaya

bijliyan girti gain aur aashiyan banta gaya

ashk-e-KHun bahne ka chehre par nishan banta gaya

main mujassam dard-o-gham ki dastan banta gaya

aah-o-girya na-munasib zabt fitrat ke KHilaf

dard mere waste ek imtihan banta gaya

har qadam ubhra kiye naqsh-e-kaf-e-pa-e-jamal

gul pe gul khilte gae aur gulsitan banta gaya

waqt ne gulchin ke hathon qismat-e-gul saunp di

yani har baghi chaman ka baghban banta gaya

sach to ye hai inqilabaat-e-zamana ke tufail

ek ek rahzan amir-e-karwan banta gaya

sab mujhe kahte hain KHosha-chin-e-gulzar-e-'zabih'

'nur' unhin ke faiz se rangin-bayan banta gaya