kar-gar ishq mein ab tak gham-e-pinhan na hua

kār-gar ishq meñ ab tak ġham-e-pinhāñ na huā

maiñ abhī be-ḳhabar-e-kulfat-e-hijrāñ na huā

māna-e-dasht-navardī mujhe zindāñ na huā

dar-o-dīvār se kuchh hosh kā sāmāñ na huā

baaġh meñ bād-e-sabā bhejne vaale har sub.h

ham asīrān-e-qafas par kabhī ehsāñ na huā

nigah-e-nāz hai aur ahl-e-havas ke dil meñ

haa.e vo tiir jo paivast-e-rag-e-jāñ na huā

dasht-e-ġhurbat meñ pareshāñ nahīñ dil tang nahīñ

abhī dīvāna tirā qābil-e-zindāñ na huā

ham ne dekhā hai vo andāz-e-junūñ bhī jo kabhī

chāk-dil chāk-jigar chāk-garebāñ na huā

rang ko hasrat-e-parvāz abhī baaqī hai

ālam-e-nik.hat-exbarbād-e-gulistāñ na huā

daar se uThtā hai ik na.ara-e-mastāna hanūz

haa.e vo dard jo sharminda-e-darmāñ na huā

haañ bujhā de dil-e-sozāñ ko magar tū jaane

bazm-e-hastī meñ jo ye soḳhta-sāmāñ na huā

ḳhūbiyāñ tujh meñ haiñ ai ishq zamāne bhar kī

ye to kuchh da.avā-e-hamtā.ī-e-ḳhūbāñ na huā

husn-e-gulzār se dil chaak huā jaatā hai

josh-e-gul chārāgar-e-tangī-e-dāmāñ na huā

sarhadeñ jalva-gah-e-nāz se jis kī na mileñ

vo to ik khel huā chāk-e-garebāñ na huā

kahtī hai vasl kī shab vo nigah-e-ḳhvāb-ālūd

ḳhatm abhī qissa-e-betābi-e-hijrāñ na huā

aaj tak sub.h-e-azal se vahī sannāTā hai

ishq kā ghar kabhī sharminda-e-mehmāñ na huā

zindagī kyā vo tire ġham se jo dil-tang nahīñ

kyā vo shīrāza-e-hastī jo pareshāñ na huā

ahl-e-zindāñ kā ye majma.a hai subūt is kā 'firāq'

ki bikhar kar bhī ye shīrāza pareshāñ na huā

kar-gar ishq mein ab tak gham-e-pinhan na hua

main abhi be-KHabar-e-kulfat-e-hijran na hua

mana-e-dasht-nawardi mujhe zindan na hua

dar-o-diwar se kuchh hosh ka saman na hua

bagh mein baad-e-saba bhejne wale har subh

hum asiran-e-qafas par kabhi ehsan na hua

nigah-e-naz hai aur ahl-e-hawas ke dil mein

hae wo tir jo paiwast-e-rag-e-jaan na hua

dasht-e-ghurbat mein pareshan nahin dil tang nahin

abhi diwana tera qabil-e-zindan na hua

hum ne dekha hai wo andaz-e-junun bhi jo kabhi

chaak-dil chaak-jigar chaak-gareban na hua

rang ko hasrat-e-parwaz abhi baqi hai

aalam-e-nikhat-exbarbaad-e-gulistan na hua

dar se uThta hai ek nara-e-mastana hanuz

hae wo dard jo sharminda-e-darman na hua

han bujha de dil-e-sozan ko magar tu jaane

bazm-e-hasti mein jo ye soKHta-saman na hua

KHubiyan tujh mein hain ai ishq zamane bhar ki

ye to kuchh dawa-e-hamtai-e-KHuban na hua

husn-e-gulzar se dil chaak hua jata hai

josh-e-gul chaaragar-e-tangi-e-daman na hua

sarhaden jalwa-gah-e-naz se jis ki na milen

wo to ek khel hua chaak-e-gareban na hua

kahti hai wasl ki shab wo nigah-e-KHwab-alud

KHatm abhi qissa-e-betabi-e-hijran na hua

aaj tak subh-e-azal se wahi sannaTa hai

ishq ka ghar kabhi sharminda-e-mehman na hua

zindagi kya wo tere gham se jo dil-tang nahin

kya wo shiraaza-e-hasti jo pareshan na hua

ahl-e-zindan ka ye majma hai subut is ka 'firaq'

ki bikhar kar bhi ye shiraaza pareshan na hua