کارواں اپنی راہ چلتے ہیں

کارواں اپنی راہ چلتے ہیں

ہم ترے در کی خاک ملتے ہیں

فتنے جو اس نظر میں پلتے ہیں

دل کی دنیا وہی بدلتے ہیں

یوں جو آنکھوں سے اشک ڈھلتے ہیں

شاید ارمان دل نکلتے ہیں

عشق میں احتیاط کیا کیجے

گرنے والے کہیں سنبھلتے ہیں

کھیلتے تھے جو ان کے دامن سے

اب وہ حسرت سے ہاتھ ملتے ہیں

جان پر اپنی کھیلنے والے

میرے نقش قدم پہ چلتے ہیں

اب تو دل بھی نہیں ہے پہلو میں

اب یہ ارمان کیوں مچلتے ہیں

غم نہ کر ان کی بے رخی کا حزیںؔ

یوں ہی حالات دل بدلتے ہیں