karwan der se tayyar hai jaane ke liye

kārvāñ der se tayyār hai jaane ke liye

ham hī baiThe haiñ koī sog manāne ke liye

ye to ab ḳhatm huī yaad hī karte karte

dūsrī 'umr mile tujh ko bhulāne ke liye

jis ne zulmat meñ hameñ chhoḌ diyā thā tanhā

aa gayā sham' vo turbat pe jalāne ke liye

biich mahfil meñ tamāsha mujhe karnā hī paḌā

us ko paimān-e-vafā yaad dilāne ke liye

kahkashāñ phuul dhanak sab haiñ magar duniyā meñ

rang kam haiñ tirī tasvīr sajāne ke liye

'ishq meñ apne unheñ dāva-e-vahsaht bhī hai

aur baiThe haiñ garebān silāne ke liye

raaz kuchh bhī nahīñ hai ġhair ki bātoñ meñ na aa

sab bahāne haiñ tujhe paas biThāne ke liye

kyā tirā hogā zamāna ye huā hai kis kā

tū ne kyoñ chhoḌ diyā mujh ko zamāna ke liye

is qadar ruuh meñ shāmil thī kahānī us kī

mujh ko miTnā hī paḌā us ko miTāne ke liye

vā-e-qismat ke use ab hai vafā kī hasrat

jab marāsim hī nahīñ koī nibhāne ke liye

kunj-e-zindān meñ phir nik.hat-e-gul phail ga.ī

phir bahār aa ga.ī bulbul ko rulāne ke liye

ḳhvāb bhī aañkh meñ bedār hue jaate haiñ

kaun aayā hai mujhe shaam sulāne ke liye

karwan der se tayyar hai jaane ke liye

hum hi baiThe hain koi sog manane ke liye

ye to ab KHatm hui yaad hi karte karte

dusri 'umr mile tujh ko bhulane ke liye

jis ne zulmat mein hamein chhoD diya tha tanha

aa gaya sham' wo turbat pe jalane ke liye

bich mahfil mein tamasha mujhe karna hi paDa

us ko paiman-e-wafa yaad dilane ke liye

kahkashan phul dhanak sab hain magar duniya mein

rang kam hain teri taswir sajaane ke liye

'ishq mein apne unhen dawa-e-wahsaht bhi hai

aur baiThe hain gareban silane ke liye

raaz kuchh bhi nahin hai ghair ki baaton mein na aa

sab bahane hain tujhe pas biThane ke liye

kya tera hoga zamana ye hua hai kis ka

tu ne kyon chhoD diya mujh ko zamana ke liye

is qadar ruh mein shamil thi kahani us ki

mujh ko miTna hi paDa us ko miTane ke liye

wa-e-qismat ke use ab hai wafa ki hasrat

jab marasim hi nahin koi nibhane ke liye

kunj-e-zindan mein phir nikhat-e-gul phail gai

phir bahaar aa gai bulbul ko rulane ke liye

KHwab bhi aankh mein bedar hue jate hain

kaun aaya hai mujhe sham sulane ke liye