kase mein apne chand sitare liye hue

kaase meñ apne chāñd sitāre liye hue

darvesh chal rahā hai ḳhasāre liye hue

kis intizār meñ hai ḳhudā jaane aa.ina

qabze meñ nain-naqsh hamāre liye hue

gaaḌī ke nīche aa gayā ik baap kā ġhurūr

bachchoñ ke man-pasand ġhubāre liye hue

lahreñ palaT rahī haiñ use chhū ke ḳhvāb meñ

dariyā simaT rahā hai kināre liye hue

ham bhī guzar rahe haiñ tumhāre firāq se

āñkhoñ meñ āñsuoñ ke sharāre liye hue

sāda-mizāj log samajhte nahīñ magar

vo aañkh hai hazār ishāre liye hue

dil dab rahā hai bār-e-mohabbat meñ āj-kal

'zahrāb' ḳhvāhishoñ ke sahāre liye hue

kase mein apne chand sitare liye hue

darwesh chal raha hai KHasare liye hue

kis intizar mein hai KHuda jaane aaina

qabze mein nain-naqsh hamare liye hue

gaDi ke niche aa gaya ek bap ka ghurur

bachchon ke man-pasand ghubare liye hue

lahren palaT rahi hain use chhu ke KHwab mein

dariya simaT raha hai kinare liye hue

hum bhi guzar rahe hain tumhaare firaq se

aankhon mein aansuon ke sharare liye hue

sada-mizaj log samajhte nahin magar

wo aankh hai hazar ishaare liye hue

dil dab raha hai bar-e-mohabbat mein aaj-kal

'zahrab' KHwahishon ke sahaare liye hue