kash aisa ho ki wo hum ko manane aae

kaash aisā ho ki vo ham ko manāne aa.e

ab bhī ulfat hai use ham se batāne aa.e

jo sunātā thā sabhī vasl ke qisse ham ko

ab vo ik hijr kā qissa bhī sunāne aa.e

bhar ga.e zaḳhm mire dil ke purāne saare

us se kah do ki na.e zaḳhm lagāne aa.e

ho ga.e sard jo ye hijr ke maare jazbe

aise jazbāt ko phir aag lagāne aa.e

ham bhī māneñge ki va.adoñ kā baḌā sachchā hai

ham se ik va.ada kiyā thā vo nibhāne aa.e

saath baiThe haiñ ye ab haath meñ sāġhar thāme

shaiḳh sāhab the nasha ham se chhuḌāne aa.e

terī yādoñ meñ thā khoyā ki mirī aañkh lagī

mujh ko phir raat ga.e ḳhvāb suhāne aa.e

aaj ik saañp sar-e-rāh guzarte dekhā

'shān' kuchh dost mujhe yaad purāne aa.e

kash aisa ho ki wo hum ko manane aae

ab bhi ulfat hai use hum se batane aae

jo sunata tha sabhi wasl ke qisse hum ko

ab wo ek hijr ka qissa bhi sunane aae

bhar gae zaKHm mere dil ke purane sare

us se kah do ki nae zaKHm lagane aae

ho gae sard jo ye hijr ke mare jazbe

aise jazbaat ko phir aag lagane aae

hum bhi manenge ki wadon ka baDa sachcha hai

hum se ek wada kiya tha wo nibhane aae

sath baiThe hain ye ab hath mein saghar thame

shaiKH sahab the nasha hum se chhuDane aae

teri yaadon mein tha khoya ki meri aankh lagi

mujh ko phir raat gae KHwab suhane aae

aaj ek sanp sar-e-rah guzarte dekha

'shan' kuchh dost mujhe yaad purane aae