کاش ایسا ہو کہ وہ ہم کو منانے آئے

کاش ایسا ہو کہ وہ ہم کو منانے آئے

اب بھی الفت ہے اسے ہم سے بتانے آئے

جو سناتا تھا سبھی وصل کے قصے ہم کو

اب وہ اک ہجر کا قصہ بھی سنانے آئے

بھر گئے زخم مرے دل کے پرانے سارے

اس سے کہہ دو کہ نئے زخم لگانے آئے

ہو گئے سرد جو یہ ہجر کے مارے جذبے

ایسے جذبات کو پھر آگ لگانے آئے

ہم بھی مانیں گے کہ وعدوں کا بڑا سچا ہے

ہم سے اک وعدہ کیا تھا وہ نبھانے آئے

ساتھ بیٹھے ہیں یہ اب ہاتھ میں ساغر تھامے

شیخ صاحب تھے نشہ ہم سے چھڑانے آئے

تیری یادوں میں تھا کھویا کہ مری آنکھ لگی

مجھ کو پھر رات گئے خواب سہانے آئے

آج اک سانپ سر راہ گزرتے دیکھا

شانؔ کچھ دوست مجھے یاد پرانے آئے