kash hum ko usi chahat se bulaya hota

kaash ham ko usī chāhat se bulāyā hotā

apne us ahd-e-vafā ko hī nibhāyā hotā

sāmne aa ke vo karte vahī shikve ham se

itnī sī baat ko itnā na baḌhāyā hotā

tark-e-ulfat kā sabab ġhairoñ ko batlāte haiñ

yuuñ na nazroñ meñ hameñ sab kī girāyā hotā

yuuñ na karte hameñ badnām zamāne bhar meñ

kuchh to apnā bhī sitam sab ko batāyā hotā

mere afkār zamāne se chhupāte hī rahe

rasm-e-duniyā ke liye kuchh to jatāyā hotā

kaise samjhegī ye duniyā ye taġhāful ye tazād

apnā ahvāl bhī kuchh sab ko sunāyā hotā

baat karte rahe hañs hañs ke mirī ġhairoñ se

sar-e-mahfil to mirā dil na jalāyā hotā

kash hum ko usi chahat se bulaya hota

apne us ahd-e-wafa ko hi nibhaya hota

samne aa ke wo karte wahi shikwe hum se

itni si baat ko itna na baDhaya hota

tark-e-ulfat ka sabab ghairon ko batlate hain

yun na nazron mein hamein sab ki giraya hota

yun na karte hamein badnam zamane bhar mein

kuchh to apna bhi sitam sab ko bataya hota

mere afkar zamane se chhupate hi rahe

rasm-e-duniya ke liye kuchh to jataya hota

kaise samjhegi ye duniya ye taghaful ye tazad

apna ahwal bhi kuchh sab ko sunaya hota

baat karte rahe hans hans ke meri ghairon se

sar-e-mahfil to mera dil na jalaya hota