kash ki jo pahchana hota apnon ko beganon ko

kaash ki jo pahchānā hotā apnoñ ko begānoñ ko

ashkoñ se phir thoḌe hī bharte apne hī paimānoñ ko

mere dil ko sab ne samjhā ek kirā.e kā kamra

jaane kitne zaḳhm diye the maiñ ne bhī mehmānoñ ko

phuul sā nāzuk rishta thā vo ab tum us ko jaane do

kāñToñ se bhar rakkhā thā ham ne apne gul-dānoñ ko

saare ghar kī raunaq thā jo vo bhī ham ko chhoḌ gayā

kyoñ gaalī dete rahte haiñ kamroñ ko dālānoñ ko

ab jab aage hī baḌhnā hai miTTī Dāleñ ḳhatm kareñ

āḳhir kab tak Dho.eñge ham in pyāre afsānoñ ko

kashtī jab ho beach safar meñ ishq samundar sahrā kyā

manzil kī jānib ab dekho chhoḌo bhī tūfānoñ ko

tahzībeñ to ye kahtī haiñ vasl kī ḳhātir zabt karo

zabt se hotā kyā hī hāsil maar diyā armānoñ ko

jannat meñ bhī dozaḳh kā hī sog manāte rahte haiñ

ḳhushiyāñ raas nahīñ ātīñ haiñ ham jaise insānoñ ko

qatl na hogā tum se merā maiñ apnā hī dushman huuñ

aag lagā do bandūqoñ meñ pheñko tīr-kamānoñ ko

kash ki jo pahchana hota apnon ko beganon ko

ashkon se phir thoDe hi bharte apne hi paimanon ko

mere dil ko sab ne samjha ek kirae ka kamra

jaane kitne zaKHm diye the main ne bhi mehmanon ko

phul sa nazuk rishta tha wo ab tum us ko jaane do

kanTon se bhar rakkha tha hum ne apne gul-danon ko

sare ghar ki raunaq tha jo wo bhi hum ko chhoD gaya

kyon gali dete rahte hain kamron ko dalanon ko

ab jab aage hi baDhna hai miTTi Dalen KHatm karen

aaKHir kab tak Dhoenge hum in pyare afsanon ko

kashti jab ho beach safar mein ishq samundar sahra kya

manzil ki jaanib ab dekho chhoDo bhi tufanon ko

tahziben to ye kahti hain wasl ki KHatir zabt karo

zabt se hota kya hi hasil mar diya armanon ko

jannat mein bhi dozaKH ka hi sog manate rahte hain

KHushiyan ras nahin aatin hain hum jaise insanon ko

qatl na hoga tum se mera main apna hi dushman hun

aag laga do banduqon mein phenko tir-kamanon ko