kash meri jabin-e-shauq sajdon se sarfaraaz ho

kaash mirī jabīn-e-shauq sajdoñ se sarfarāz ho

yaar kī ḳhāk-e-āstāñ tāj-e-sar-e-niyāz ho

ham ko bhī pā.emāl kar umr tirī darāz ho

mast-e-ḳhirām-e-nāz idhar mashq-e-ḳhirām-e-nāz ho

chashm-e-haqīqat-e-āshnā dekhe jo husn kī kitāb

daftar-e-sad-hadīs-e-rāz har varaq-e-majāz ho

sāmne rū-e-yār ho sajde meñ ho sar-e-niyāz

yūñhī harīm-e-nāz meñ āThoñ pahar namāz ho

us ke harīm-e-nāz meñ aql-o-ḳhirad ko daḳhl kyā

jis kī galī kī ḳhaak kā zarra jahān-e-rāz ho

terī galī meñ pā ke jā jaa.e kahāñ tirā gadā

kyuuñ na vo be-niyāz ho tujh se jise niyāz ho

'bedam'-e-ḳhasta hijr meñ ban ga.ī jān-e-zār par

jis ne diyā hai dard-e-dil kaash vo chārasāz ho

kash meri jabin-e-shauq sajdon se sarfaraaz ho

yar ki KHak-e-astan taj-e-sar-e-niyaz ho

hum ko bhi paemal kar umr teri daraaz ho

mast-e-KHiram-e-naz idhar mashq-e-KHiram-e-naz ho

chashm-e-haqiqat-e-ashna dekhe jo husn ki kitab

daftar-e-sad-hadis-e-raaz har waraq-e-majaz ho

samne ru-e-yar ho sajde mein ho sar-e-niyaz

yunhi harim-e-naz mein aaThon pahar namaz ho

us ke harim-e-naz mein aql-o-KHirad ko daKHl kya

jis ki gali ki KHak ka zarra jahan-e-raaz ho

teri gali mein pa ke ja jae kahan tera gada

kyun na wo be-niyaz ho tujh se jise niyaz ho

'bedam'-e-KHasta hijr mein ban gai jaan-e-zar par

jis ne diya hai dard-e-dil kash wo chaarasaz ho