kash tufan mein safine ko utara hota

kaash tūfāñ meñ safīne ko utārā hotā

Duub jaatā bhī to maujoñ ne ubhārā hotā

ham to sāhil kā tasavvur bhī miTā sakte the

lab-e-sāhil se jo halkā sā ishārā hotā

tum hī vāqif na the ādāb-e-jafā se varna

ham ne har zulm ko hañs hañs ke sahārā hotā

ġham to ḳhair apnā muqaddar hai so is kā kyā zikr

zahr bhī ham ko ba-sad-shauq gavārā hotā

bāġhbāñ terī ināyat kā bharam kyuuñ khultā

ek bhī phuul jo gulshan meñ hamārā hotā

tum par asrār-e-fanā rāz-e-baqā khul jaate

tum ne ek baar to yazdāñ ko pukārā hotā

kash tufan mein safine ko utara hota

Dub jata bhi to maujon ne ubhaara hota

hum to sahil ka tasawwur bhi miTa sakte the

lab-e-sahil se jo halka sa ishaara hota

tum hi waqif na the aadab-e-jafa se warna

hum ne har zulm ko hans hans ke sahaara hota

gham to KHair apna muqaddar hai so is ka kya zikr

zahr bhi hum ko ba-sad-shauq gawara hota

baghban teri inayat ka bharam kyun khulta

ek bhi phul jo gulshan mein hamara hota

tum par asrar-e-fana raaz-e-baqa khul jate

tum ne ek bar to yazdan ko pukara hota