کاش وہ شوخ مرے دل میں مکیں ہو جائے

کاش وہ شوخ مرے دل میں مکیں ہو جائے

میری اجڑی ہوئی دنیا بھی حسیں ہو جائے

میرے سجدوں کو یہ اعجاز عطا کر یا رب

نقش پا ان کا مرا نقش جبیں ہو جائے

تیرے انکار میں بھی ہوتا ہے اقرار کا لطف

ہاں نہ کہنے کی جو ضد ہے تو نہیں ہو جائے

محفل پیر مغاں ہو کہ ہو بزم جاناں

دل کو برباد ہی ہونا ہے کہیں ہو جائے

حشر میں وہ بھی مرے سامنے ہوں گے یا رب

فیصلہ اپنا تو بہتر ہے یہیں ہو جائے

معجزے کرتا ہے اے سحرؔ مرا حسن نظر

اک نظر ڈال دوں جس شے پہ حسیں ہو جائے