kash wo shoKH mere dil mein makin ho jae

kaash vo shoḳh mire dil meñ makīñ ho jaa.e

merī ujḌī huī duniyā bhī hasīñ ho jaa.e

mere sajdoñ ko ye e.ajāz atā kar yā-rab

naqsh-e-pā un kā mirā naqsh-e-jabīñ ho jaa.e

tere inkār meñ bhī hotā hai iqrār kā lutf

haañ na kahne kī jo zid hai to nahīñ ho jaa.e

mahfil-e-pīr-e-muġhāñ ho ki ho bazm-e-jānāñ

dil ko barbād hī honā hai kahīñ ho jaa.e

hashr meñ vo bhī mire sāmne hoñge yā-rab

faisla apnā to behtar hai yahīñ ho jaa.e

mo.ajize kartā hai ai 'sehr' mirā husn-e-nazar

ik nazar Daal duuñ jis shai pe hasīñ ho jaa.e

kash wo shoKH mere dil mein makin ho jae

meri ujDi hui duniya bhi hasin ho jae

mere sajdon ko ye eajaz ata kar ya-rab

naqsh-e-pa un ka mera naqsh-e-jabin ho jae

tere inkar mein bhi hota hai iqrar ka lutf

han na kahne ki jo zid hai to nahin ho jae

mahfil-e-pir-e-mughan ho ki ho bazm-e-jaanan

dil ko barbaad hi hona hai kahin ho jae

hashr mein wo bhi mere samne honge ya-rab

faisla apna to behtar hai yahin ho jae

moajize karta hai ai 'sehr' mera husn-e-nazar

ek nazar Dal dun jis shai pe hasin ho jae