kaT gai kohre ki chadar sard hawa ki tezi map

kaaT ga.ī kohre kī chādar sard havā kī tezī maap

ukḌūñ baiThā is vaadī kī tanhā.ī meñ thar-thar kaañp

marmar kī ūñchā.ī chaḌhte phislā hai to ronā kyā

paañv pasāre kīchaḌ meñ ukhḌī sāñsoñ kī maalā jaap

uḌte panchhī pyāsī nazroñ kī pahchān se aarī haiñ

tez huī jaatī haiñ kirneñ thaap sahelī gobar thaap

phūTī chūḌī TuuTī dhanak rañgoñ kā sehr bikhartā sā

suune ufuq par bahte bādal garm tave se uThtī bhaap

bāñsoñ ke jañgal kī chilman husn jhalaktā manzil kā

baḌhte hue qadmoñ kī taak meñ sūkhe hue pattoñ par saañp

garm-e-safar hai garm-e-safar rah muḌ muḌ kar mat pīchhe dekh

ek do manzil saath chalegī paTke hue qadmoñ kī chaap

jhuum rahī hai bhañvar meñ kashtī sāhil-o-tūfāñ raqs meñ haiñ

thakī huī āñkheñ so jaa.eñ aisā koī raag alaap

dekh phaphūñd lagī dīvāreñ majlis bhī ban saktī haiñ

tūfānī mausam hai 'shafīq' ab aur kahīñ kā rasta naap

kaT gai kohre ki chadar sard hawa ki tezi map

ukDun baiTha is wadi ki tanhai mein thar-thar kanp

marmar ki unchai chaDhte phisla hai to rona kya

panw pasare kichaD mein ukhDi sanson ki mala jap

uDte panchhi pyasi nazron ki pahchan se aari hain

tez hui jati hain kirnen thap saheli gobar thap

phuTi chuDi TuTi dhanak rangon ka sehr bikharta sa

sune ufuq par bahte baadal garm tawe se uThti bhap

banson ke jangal ki chilman husn jhalakta manzil ka

baDhte hue qadmon ki tak mein sukhe hue patton par sanp

garm-e-safar hai garm-e-safar rah muD muD kar mat pichhe dekh

ek do manzil sath chalegi paTke hue qadmon ki chap

jhum rahi hai bhanwar mein kashti sahil-o-tufan raqs mein hain

thaki hui aankhen so jaen aisa koi rag alap

dekh phaphund lagi diwaren majlis bhi ban sakti hain

tufani mausam hai 'shafiq' ab aur kahin ka rasta nap