kaTa safar to humne baDi hi lagan ke sath

kaaTā safar to ham ne baḌī hī lagan ke saath

manzil pe jā ke baiThe to baiThe thakan ke saath

go shahr-e-ajnabī meñ koī āshnā na thā

lekin milā jo shaḳhs milā apne-pan ke saath

koī libās qīmtī pahne nahīñ gayā

jo bhī gayā gayā hai vo kore kafan ke saath

irfān-e-zāt kī taraf karte nahīñ rujūa

ham aur saare kaam haiñ karte jatan ke saath

khul kar na saañs lī na koī baat kar sake

duniyā meñ ham ko jiinā paḌā hai ghuTan ke saath

jab bolte haiñ aap to jhaḌte haiñ muñh se phuul

rahte haiñ aap kyā kisī ġhuncha-dahan ke saath

'rānā' ḳhush-āmdīd kyoñ un ko na maiñ kahūñ

merā to dostāna hai ranj-o-mehan ke saath

kaTa safar to hum ne baDi hi lagan ke sath

manzil pe ja ke baiThe to baiThe thakan ke sath

go shahr-e-ajnabi mein koi aashna na tha

lekin mila jo shaKHs mila apne-pan ke sath

koi libas qimti pahne nahin gaya

jo bhi gaya gaya hai wo kore kafan ke sath

irfan-e-zat ki taraf karte nahin rujua

hum aur sare kaam hain karte jatan ke sath

khul kar na sans li na koi baat kar sake

duniya mein hum ko jina paDa hai ghuTan ke sath

jab bolte hain aap to jhaDte hain munh se phul

rahte hain aap kya kisi ghuncha-dahan ke sath

'rana' KHush-amdid kyon un ko na main kahun

mera to dostana hai ranj-o-mehan ke sath