کاٹی ہے عمر صبح تمنا کے خواب میں

کاٹی ہے عمر صبح تمنا کے خواب میں

راتیں بسر ہوئی ہیں مگر اضطراب میں

جلوؤں کی وہ تڑپ کا ہے عالم نقاب میں

جیسے کہ برق کوند رہی ہو سحاب میں

قربان جائیے ستم روزگار کے

وہ دیکھنا پڑا جو نہ دیکھا تھا خواب میں

کب تک رہیں گی شام الم کی نوازشیں

تاروں سے پوچھنا ہے سحر کے جواب میں

کیوں آج حادثات کے اٹھتے نہیں قدم

یہ کون آ گیا ہے رہ انقلاب میں

ہاں آپ ہی سے رونق بزم خیال ہے

ہاں آپ ہی کو ہم نے پکارا تھا خواب میں

بیتے دنوں کی یاد بھلانے کے واسطے

پینا پڑا ہے خون تمنا شراب میں

لرزاں تھا کائنات کا دل جن سے اے کمالؔ

وہ دھڑکنیں لکھی گئیں میرے حساب میں