kab baat ho baghair KHushamad wahan durust

kab baat ho baġhair ḳhushāmad vahāñ durust

vo nā-durust bhī jo kaheñ kahiye haañ durust

thoḌe se din bahār ke haiñ kis umiid par

karte haiñ apne murġh-e-chaman āshiyāñ durust

kuchh maiñ bhī apnā hāl-e-tabī.at bayāñ karūñ

gar ho mizāj aap kā ai mehrbāñ durust

us ko durustī-e-dil-e-āshiq se kyā ġharaz

jis bad-zabān kī nahīñ ab tak zabāñ durust

āñkhoñ meñ rah ki dil meñ Thahar tere vāste

ārāsta har ek makāñ har makāñ durust

har roz tāziyāna-e-zulf-e-darāz se

tū ne bhī dil ko ḳhuub kiyā merī jaañ durust

aatā hai sāmne jo vo ġhārat-gar-e-shakeb

ausān 'dāġh' rahte haiñ apne kahāñ durust

kab baat ho baghair KHushamad wahan durust

wo na-durust bhi jo kahen kahiye han durust

thoDe se din bahaar ke hain kis umid par

karte hain apne murgh-e-chaman aashiyan durust

kuchh main bhi apna haal-e-tabiat bayan karun

gar ho mizaj aap ka ai mehrban durust

us ko durusti-e-dil-e-ashiq se kya gharaz

jis bad-zaban ki nahin ab tak zaban durust

aankhon mein rah ki dil mein Thahar tere waste

aarasta har ek makan har makan durust

har roz taziyana-e-zulf-e-daraaz se

tu ne bhi dil ko KHub kiya meri jaan durust

aata hai samne jo wo ghaarat-gar-e-shakeb

ausan 'dagh' rahte hain apne kahan durust