kab baiThte hain chain se iza uThae bin

kab baiThte haiñ chain se iizā uThā.e bin

lagtā nahīñ hai jī kahīñ laggā lagā.e bin

jab tak na be-qarār hoñ paḌtā nahīñ qarār

aatā nahīñ hai chain hameñ tilmilā.e bin

be-āh-o-nāla muñh se nikaltī nahīñ hai baat

hairān baiThe rahte haiñ aañsū bahā.e bin

zindāñ lage hai ghar jo kisī kā na hoñ asiir

aate nahīñ ba-ḳhud kahīñ ham aa.e jaa.e bin

dīvāne gar na hoñ to parī-rū na dekheñ sair

bigḌe hai baat hāl-e-pareshāñ banā.e bin

jumbish na dast-o-pā meñ ho be-shorish-e-junūñ

afsurda-tab.a rahte haiñ dhūmeñ machā.e bin

gar ho na dard-e-ishq to be-dard ham kahā.eñ

kuchh lutf-e-guftugū hī nahīñ hā.e-vā.e bin

kyā josh-e-tab.a ho na mai-e-ishq gar piyeñ

kuchh kaifiyat nahīñ hai ye pyāla pilā.e bin

gar bar meñ ho na koī to pahlū-tahī rahe

kyā baiThnā hai zaanū se zaanū bhiḌā.e bin

koī na de dikhā.ī to kyā ḳhaak dekhiye

rahte asīr-e-ġham haiñ kisī ke bulā.e bin

afkār saikḌoñ hoñ agar ho na fikr-e-ishq

vārastagī kahāñ hai kaheñ jī phañsā.e bin

qātil se gar na miliye to 'jur.at' hamārī kyā

juuñ gul shagufta ho na koī zaḳhm khaa.e bin

kab baiThte hain chain se iza uThae bin

lagta nahin hai ji kahin lagga lagae bin

jab tak na be-qarar hon paDta nahin qarar

aata nahin hai chain hamein tilmilae bin

be-ah-o-nala munh se nikalti nahin hai baat

hairan baiThe rahte hain aansu bahae bin

zindan lage hai ghar jo kisi ka na hon asir

aate nahin ba-KHud kahin hum aae jae bin

diwane gar na hon to pari-ru na dekhen sair

bigDe hai baat haal-e-pareshan banae bin

jumbish na dast-o-pa mein ho be-shorish-e-junun

afsurda-taba rahte hain dhumen machae bin

gar ho na dard-e-ishq to be-dard hum kahaen

kuchh lutf-e-guftugu hi nahin hae-wae bin

kya josh-e-taba ho na mai-e-ishq gar piyen

kuchh kaifiyat nahin hai ye pyala pilae bin

gar bar mein ho na koi to pahlu-tahi rahe

kya baiThna hai zanu se zanu bhiDae bin

koi na de dikhai to kya KHak dekhiye

rahte asir-e-gham hain kisi ke bulae bin

afkar saikDon hon agar ho na fikr-e-ishq

warastagi kahan hai kahen ji phansae bin

qatil se gar na miliye to 'jurat' hamari kya

jun gul shagufta ho na koi zaKHm khae bin