kab bayaban rah mein aaya ye samjha hi nahin

kab bayābāñ raah meñ aayā ye samjhā hī nahīñ

chalte rahne ke sivā dhyān aur kuchh thā hī nahīñ

karb-e-manzil kā ho kyā ehsās in ashjār ko

jin ke saa.e meñ musāfir koī Thahrā hī nahīñ

kis ko batlāte ki aa.e haiñ kahāñ se kaun haiñ

ham faqīroñ kā kisī ne haal pūchhā hī nahīñ

kyā talab kartā kisī se zindagī kā ḳhūñ-bahā

mujrmoñ meñ merā qātil koī niklā hī nahīñ

be-tahāshā pyaar kī daulat luTā.ī umr bhar

dostī kā ham ne kuchh anjām sochā hī nahīñ

ghūmtā paayā gayā thā shahr meñ vo ek din

phir kisī ne tere dīvāne ko dekhā hī nahīñ

dosto 'ḳhāvar' sunā.e kyā tumheñ taaza ġhazal

muddatoñ se us ne koī sher likkhā hī nahīñ

kab bayaban rah mein aaya ye samjha hi nahin

chalte rahne ke siwa dhyan aur kuchh tha hi nahin

karb-e-manzil ka ho kya ehsas in ashjar ko

jin ke sae mein musafir koi Thahra hi nahin

kis ko batlate ki aae hain kahan se kaun hain

hum faqiron ka kisi ne haal puchha hi nahin

kya talab karta kisi se zindagi ka KHun-baha

mujrmon mein mera qatil koi nikla hi nahin

be-tahasha pyar ki daulat luTai umr bhar

dosti ka hum ne kuchh anjam socha hi nahin

ghumta paya gaya tha shahr mein wo ek din

phir kisi ne tere diwane ko dekha hi nahin

dosto 'KHawar' sunae kya tumhein taza ghazal

muddaton se us ne koi sher likkha hi nahin