kab dil shikast-gan se kar arz-e-haal aaya

kab dil shikast-gāñ se kar arz-e-hāl aayā

hai be-sadā vo chīnī jis meñ ki baal aayā

siine se maiñ duā ko laayā jo shab laboñ tak

kahne lagī ijābat kīdhar ḳhayāl aayā

kaunain tak milī thī jis dil kī mujh ko qīmat

qismat ki yak nigah par jā us ko Daal aayā

baḳhshish pe do jahāñ ke aa.ī thī himmat-e-dahr

lekin na yaañ zabāñ tak harf-e-savāl aayā

nāzāñ na ho tū is par gar tujh ko sañg meñ se

gauhar nikālne kā kasb o kamāl aayā

arbāb-e-fahm aage vo sāhab-e-hunar hai

kiina kisī ke dil se jis ko nikāl aayā

dair-e-ḳharāb meñ kal ik mast kī zabāñ par

ye sher us jagah ke kyā hasb-e-hāl aayā

a.amāl dekh tere mai sharm se araq hai

ai mohtasib tujhe bhī kuchh infi.āl aayā

milne kā ek dam bhī yaañ zo.af-e-dil hai maan.e

uktā ke uTh gayā vo tab maiñ bahāl aayā

naḳhl-e-hayāt apnā gulshan meñ bāġhbāñ ne

boyā to thā havas kar lekin na paal aayā

iksīr hai to kyā hai vo musht-e-ḳhāk 'saudā'

ḳhātir pe jab kisī kī jis se malāl aayā

kab dil shikast-gan se kar arz-e-haal aaya

hai be-sada wo chini jis mein ki baal aaya

sine se main dua ko laya jo shab labon tak

kahne lagi ijabat kidhar KHayal aaya

kaunain tak mili thi jis dil ki mujh ko qimat

qismat ki yak nigah par ja us ko Dal aaya

baKHshish pe do jahan ke aai thi himmat-e-dahr

lekin na yan zaban tak harf-e-sawal aaya

nazan na ho tu is par gar tujh ko sang mein se

gauhar nikalne ka kasb o kamal aaya

arbab-e-fahm aage wo sahab-e-hunar hai

kina kisi ke dil se jis ko nikal aaya

dair-e-KHarab mein kal ek mast ki zaban par

ye sher us jagah ke kya hasb-e-haal aaya

aamal dekh tere mai sharm se araq hai

ai mohtasib tujhe bhi kuchh infial aaya

milne ka ek dam bhi yan zoaf-e-dil hai mane

ukta ke uTh gaya wo tab main bahaal aaya

naKHl-e-hayat apna gulshan mein baghban ne

boya to tha hawas kar lekin na pal aaya

iksir hai to kya hai wo musht-e-KHak 'sauda'

KHatir pe jab kisi ki jis se malal aaya