kab gawara hai mujhe aur kahin par chamke

kab gavārā hai mujhe aur kahīñ par chamke

merā sūraj hai to phir merī zamīñ par chamke

kitne gulshan ki saje the mire iqrār ke naam

kitne ḳhanjar ki mirī ek nahīñ par chamke

jis ne din bhar kī tamāzat ko sameTā chup-chāp

shab ko taare bhī usī dasht-nashīñ par chamke

ye tirī bazm ye ik silsila-e-nik.hat-o-nūr

jitne tārīk muqaddar the yahīñ par chamke

yuuñ bhī ho vasl kā sūraj kabhī ubhre aur phir

shām-e-hijrāñ tire ik ek makīñ par chamke

aañkh kī zid hai ki palkoñ pe sitāre TūTeñ

dil kī ḳhvāhish ki har ik zaḳhm yahīñ par chamke

kab gawara hai mujhe aur kahin par chamke

mera suraj hai to phir meri zamin par chamke

kitne gulshan ki saje the mere iqrar ke nam

kitne KHanjar ki meri ek nahin par chamke

jis ne din bhar ki tamazat ko sameTa chup-chap

shab ko tare bhi usi dasht-nashin par chamke

ye teri bazm ye ek silsila-e-nikhat-o-nur

jitne tarik muqaddar the yahin par chamke

yun bhi ho wasl ka suraj kabhi ubhre aur phir

sham-e-hijran tere ek ek makin par chamke

aankh ki zid hai ki palkon pe sitare TuTen

dil ki KHwahish ki har ek zaKHm yahin par chamke