کب ہم نے کہا ہے کہ سدا سوچتے رہنا

کب ہم نے کہا ہے کہ سدا سوچتے رہنا

ہاں یاد جب آئیں تو ذرا سوچتے رہنا

لمحوں میں بدل جاتی ہے تقدیر زمانہ

اس بات کو اے مرد خدا سوچتے رہنا

اس طرح گزارے ہیں شب ہجر کے لمحات

اس شخص کی اک ایک ادا سوچتے رہنا

کس عہد میں بھیجا گیا یہ سوچ رہا ہوں

جس عہد میں ہر دم ہے سزا سوچتے رہنا

یہ بھی نہ کہیں اس سے تعلق کا سبب ہو

کیوں اس نے کہا کیسے کہا سوچتے رہنا

واصلؔ تجھے جو کہنا ہے بس آج ہی کہہ لے

اچھا نہیں تا عمر ترا سوچتے رہنا