kab hawas-karon ne duniya ke dahane dekhe

kab havas-kāroñ ne duniyā ke dahāne dekhe

Dūbne ke jo the duniyā meñ Thikāne dekhe

apne ḳhalvat-kada-e-ġham meñ rahe ahl-e-hijāb

be-hijābī ne to mahshar ke zamāne dekhe

surḳhiyāñ jin kī haiñ markūz nigāh-e-ālam

tum ne vo qisse paḌhe haiñ jo fasāne dekhe

ek halkā sā bhī partav nazar aayā na tirā

yuuñ to ham ne bhī ka.ī ā.ina-ḳhāne dekhe

duur jab haqq-o-sadāqat se hue ahl-e-ḳhirad

har-nafas apnī tabāhī ke Thikāne dekhe

aaj tak un kī haqīqat na khulī ham pe 'nashāt'

ḳhvāb hī rah ga.e jo ḳhvāb suhāne dekhe

kab hawas-karon ne duniya ke dahane dekhe

Dubne ke jo the duniya mein Thikane dekhe

apne KHalwat-kada-e-gham mein rahe ahl-e-hijab

be-hijabi ne to mahshar ke zamane dekhe

surKHiyan jin ki hain markuz nigah-e-alam

tum ne wo qisse paDhe hain jo fasane dekhe

ek halka sa bhi partaw nazar aaya na tera

yun to hum ne bhi kai aaina-KHane dekhe

dur jab haqq-o-sadaqat se hue ahl-e-KHirad

har-nafas apni tabahi ke Thikane dekhe

aaj tak un ki haqiqat na khuli hum pe 'nashat'

KHwab hi rah gae jo KHwab suhane dekhe