کب جہاں سے ہے دشمنی میری

کب جہاں سے ہے دشمنی میری

جنگ کوئی ہے داخلی میری

اک مکمل غزل ہے میرا وجود

ہر سو پھیلی سخن وری میری

تجھ سے ملنے کا کب یہ مطلب تھا

بات پہنچے گلی گلی میری

حال اندر کا جانتا ہے وہ

دل ہی کرتا ہے مخبری میری

خود مقابل ہوں اپنی ہستی کے

یہی تعزیر ہے بڑی میری

اپنے دامن کو بھر لیا اس نے

مشتہر کر کے مفلسی میری

تو نے سوچا تو آ گئی ہوں میں

عمر ہے کس قدر بڑی میری

میری پلکوں سے بہہ رہی ہے صدفؔ

قطرہ قطرہ یہ زندگی میری