kab KHala mein suraj ki Dhaye se sham hoti hai

kab ḳhalā meñ sūraj kī Dhaye se shaam hotī hai

bad-du'ā sī bad-sūrat shai se shaam hotī hai

āftāb jab thak ke hauz se nikaltā hai

tab sarāb-zādoñ kī nai se shaam hotī hai

ghoñsle bulāte haiñ panchhiyoñ ko peḌoñ meñ

jab fazā meñ chīloñ kī qai se shaam hotī hai

kaun dekh paatā hai raat kī siyāhkārī

din ko hosh aatā hai mai se shaam hotī hai

raushnī kī saḌkoñ par ḳhauf gungunātā hai

sar se raat aatī hai lai se shaam hotī hai

maiñ pakaḌ ke rakhtā huuñ tīrgī ko āñkhoñ meñ

kuchh samajh nahīñ aatā kaise shaam hotī hai

mere asr kā sūraj bād-e-asr ugtā hai

phir siyāhī ke haq meñ jaise shaam hotī hai

gate khaTkhaTātā huuñ jab bhī der se 'asvad'

us ko raat lagtī hai vaise shaam hotī hai

kab KHala mein suraj ki Dhaye se sham hoti hai

bad-du'a si bad-surat shai se sham hoti hai

aaftab jab thak ke hauz se nikalta hai

tab sarab-zadon ki nai se sham hoti hai

ghonsle bulate hain panchhiyon ko peDon mein

jab faza mein chilon ki qai se sham hoti hai

kaun dekh pata hai raat ki siyahkari

din ko hosh aata hai mai se sham hoti hai

raushni ki saDkon par KHauf gungunata hai

sar se raat aati hai lai se sham hoti hai

main pakaD ke rakhta hun tirgi ko aankhon mein

kuchh samajh nahin aata kaise sham hoti hai

mere asr ka suraj baad-e-asr ugta hai

phir siyahi ke haq mein jaise sham hoti hai

gate khaTkhaTata hun jab bhi der se 'aswad'

us ko raat lagti hai waise sham hoti hai