kab lazzaton ne zehn ka pichha nahin kiya

kab lazzatoñ ne zehn kā pīchhā nahīñ kiyā

ye merā hausla thā ki lab vā nahīñ kiyā

tajdīd-e-irtibāt bhī mumkin thī baa'd meñ

maiñ ne hī is ravish ko gavārā nahīñ kiyā

pahle to ik junūn sā arz-e-talab kā thā

jab vo milā to dil ne taqāzā nahīñ kiyā

sūraj rahā jo din meñ mire ghar se duur duur

phir maiñ ne raat meñ bhī ujālā nahīñ kiyā

kyā vahm thā ki khilte hī lab band ho ga.e

kyā baat thī ki lafz bhī puurā nahīñ kiyā

jab merā ishtiyāq huā zabt-āzmā

phir us ne apne aap hī pardā nahīñ kiyā

maiñ sāda-lauh sāda-bayāñ sāda-ārzū

aur us ne sādgī pe bharosā nahīñ kiyā

maiñ ne bhī chalte chalte kiyā thā yūñhī savāl

kyā ho gayā jo aap ne puurā nahīñ kiyā

vo kam-nigāh thā magar us se churā ke aañkh

maiñ ne bhī apne saath kuchh achchhā nahīñ kiyā

amrit samajh ke pī liyā 'anjum' ne zahr-e-ġham

lekin tumhāre naam ko rusvā nahīñ kiyā

kab lazzaton ne zehn ka pichha nahin kiya

ye mera hausla tha ki lab wa nahin kiya

tajdid-e-irtibaat bhi mumkin thi ba'd mein

main ne hi is rawish ko gawara nahin kiya

pahle to ek junun sa arz-e-talab ka tha

jab wo mila to dil ne taqaza nahin kiya

suraj raha jo din mein mere ghar se dur dur

phir main ne raat mein bhi ujala nahin kiya

kya wahm tha ki khilte hi lab band ho gae

kya baat thi ki lafz bhi pura nahin kiya

jab mera ishtiyaq hua zabt-azma

phir us ne apne aap hi parda nahin kiya

main sada-lauh sada-bayan sada-arzu

aur us ne sadgi pe bharosa nahin kiya

main ne bhi chalte chalte kiya tha yunhi sawal

kya ho gaya jo aap ne pura nahin kiya

wo kam-nigah tha magar us se chura ke aankh

main ne bhi apne sath kuchh achchha nahin kiya

amrit samajh ke pi liya 'anjum' ne zahr-e-gham

lekin tumhaare nam ko ruswa nahin kiya