kab marhala-e-gham se guzarna nahin hota

kab marhala-e-ġham se guzarnā nahīñ hotā

pal-bhar ko savārī se utarnā nahīñ hotā

uḌne do mirī ḳhaak sameToge kahāñ tak

yakjā hī na hotā jo bikharnā nahīñ hotā

chhat se kabhī utrā to nazar aayā falak par

ziine se kabhī us kā utarnā nahīñ hotā

duniyā kā koī kaam ho āsān se āsān

honā ho to hotā hai vagarna nahīñ hotā

laatā huuñ samajh soch ke har baat zabāñ par

kahtā huuñ vahī jis se mukarnā nahīñ hotā

ek-ādh koī sher ka.ī saal meñ kahtā

jaldī hī mujhe kyā thī jo marnā nahīñ hotā

kab marhala-e-gham se guzarna nahin hota

pal-bhar ko sawari se utarna nahin hota

uDne do meri KHak sameToge kahan tak

yakja hi na hota jo bikharna nahin hota

chhat se kabhi utra to nazar aaya falak par

zine se kabhi us ka utarna nahin hota

duniya ka koi kaam ho aasan se aasan

hona ho to hota hai wagarna nahin hota

lata hun samajh soch ke har baat zaban par

kahta hun wahi jis se mukarna nahin hota

ek-adh koi sher kai sal mein kahta

jaldi hi mujhe kya thi jo marna nahin hota