kab panw figar nahin hote kab sar mein dhul nahin hoti

kab paañv figār nahīñ hote kab sar meñ dhuul nahīñ hotī

tirī raah pe chalne vāloñ se lekin kabhī bhuul nahīñ hotī

sar-e-kūcha-e-ishq aa pahuñche ho lekin zarā dhyān rahe ki yahāñ

koī nekī kaam nahīñ aatī koī duā qubūl nahīñ hotī

har-chand andesha-e-jāñ hai bahut lekin is kār-e-mohabbat meñ

koī pal bekār nahīñ jaatā koī baat fuzūl nahīñ hotī

tire vasl kī aas badalte hue tire hijr kī aag meñ jalte hue

kab dil masrūf nahīñ rahtā kab jaañ mashġhūl nahīñ hotī

har rañg-e-junūñ bharne vaalo shab-bedārī karne vaalo

hai ishq vo mazdūrī jis meñ mehnat bhī vasūl nahīñ hotī

kab panw figar nahin hote kab sar mein dhul nahin hoti

teri rah pe chalne walon se lekin kabhi bhul nahin hoti

sar-e-kucha-e-ishq aa pahunche ho lekin zara dhyan rahe ki yahan

koi neki kaam nahin aati koi dua qubul nahin hoti

har-chand andesha-e-jaan hai bahut lekin is kar-e-mohabbat mein

koi pal bekar nahin jata koi baat fuzul nahin hoti

tere wasl ki aas badalte hue tere hijr ki aag mein jalte hue

kab dil masruf nahin rahta kab jaan mashghul nahin hoti

har rang-e-junun bharne walo shab-bedari karne walo

hai ishq wo mazduri jis mein mehnat bhi wasul nahin hoti