kab phul khilen shaghl chhiDe jama-dari ka

kab phuul khileñ shaġhl chhiḌe jāma-darī kā

dīvānoñ ko chaska hai isī ḳhush-ḳhabarī kā

so.e the sar-e-shām khulī pichhle pahar aañkh

muñh dekh ke uTThe haiñ charāġh-e-saharī kā

kuchh apnī taraf merī nigāhoñ se bhī dekho

is ruḳh se bhī ik baab khule ḳhud-nigarī kā

nā-sāz havā-e-par-e-parvāz na ho jaa.e

mausam to gayā ḳhair se be-bāl-o-parī kā

ye chāñd ye sūraj ye añdherā ye ujālā

muñh dekh rahā hai safarī har safarī kā

qaa.em nahīñ rahtī haiñ kisī shai pe nigāheñ

ab koī Thikānā hai pareshāñ-nazarī kā

fitrat hī se miltī hai 'razā' dād-e-suḳhan bhī

jab farz adā hotā hai paiġhāmbarī kā

kab phul khilen shaghl chhiDe jama-dari ka

diwanon ko chaska hai isi KHush-KHabari ka

soe the sar-e-sham khuli pichhle pahar aankh

munh dekh ke uTThe hain charagh-e-sahari ka

kuchh apni taraf meri nigahon se bhi dekho

is ruKH se bhi ek bab khule KHud-nigari ka

na-saz hawa-e-par-e-parwaz na ho jae

mausam to gaya KHair se be-baal-o-pari ka

ye chand ye suraj ye andhera ye ujala

munh dekh raha hai safari har safari ka

qaem nahin rahti hain kisi shai pe nigahen

ab koi Thikana hai pareshan-nazari ka

fitrat hi se milti hai 'raza' dad-e-suKHan bhi

jab farz ada hota hai paighambari ka