کب سمندر ہوں کہاں دریا ہوں میں

کب سمندر ہوں کہاں دریا ہوں میں

اپنے ہی کردار میں ڈوبا ہوں میں

میری فطرت ہے صداقت کی امیں

سچ کو سچ کہنے سے کب جھجکا ہوں میں

رات دن کیوں ہو تعاقب میں مرے

چھو نہ پاؤ گے بہت اونچا ہوں میں

جس کہانی کا میں اک کردار تھا

وہ کہانی اب سمجھ پایا ہوں میں

ساری دنیا اک طرف میں اک طرف

لو خریدو کس قدر سستا ہوں میں

آج بھی انسانیت کے نام پر

مل کے اک انسان سے رویا ہوں میں

توڑنا یوں مجھ کو مشکل ہے عتیقؔ

سچ کی اونچی شاخ پہ پھلتا ہوں میں